Klaten, Jawa Tengah www.jogjatv.tv Kangge upacara bersih dhusun ngiras mahargya warsa enggal Jawa, warga Padhukuhan Gebungan, Desa Kalangan, Pedan, Klaten, nggelar pagelaran ringgit purwa sedalu natas. Kaajab tumapak warsa enggal Jawa samangke, warga tansah linuberan berkah lan karaharjan saking Gusti Ingkang Maha Agung.

Pagelaran ringgit sedalu natas kangge bersih dhusun punika dipun gelar dhateng salah satunggal griyanipun warga Padhukuhan Gebungan, Desa Kalangan, Kecamatan Pedan, Klaten malem Rebo (20/10) kalawingi. Pagelaran ringgit punika dening dhalang Ki Bagong Sugiyanto, kanthi lampahan Semar Maneges.

Kepala Desa Kalangan, Fahrudin mratelakaken, pagelaran ringgit purwa inggih ajeg dipun adani saben upacara bersih desa. Dene upacara bersih desa punika minangka wujud raos syukur sarta nyuwun dhateng ngarsaning Gusti amrih para warga tansah linuberan berkah lan karaharjan.

Fahrudin ugi mratelakaken, ing Desa Kalangan wonten enem padhukuhan ingkang nggelar upacara bersih desa kanthi gentosan lan tansah dipun regengaken pagelaran ringgit purwa. Tumrap warga Desa Kalangan, maneka kabudayan warisan nenek moyang punika badhe tansah dipun pepetri amrih lestari.

Sri Haryadi