Kulonprogo, www.jogjatv.tv – Kalihlikur dhalang cilik saking gangsal kabupaten kota sa DIY tumut lampahing festival dhalang cilik ingkang dipun gelar dhateng Sanggar Badranaya, Padhukuhan Watumurah, Desa Pendoworejo, Kecamatan Girimulyo, Kulonprogo, dinten Minggu (8/11) enjing.

Saben dhalang dipun sukani wekdal 45 menit kangge mitontonaken kasagedanipun. Lampahing festival dipun purwakani pagelaran kanthi dhalang Aditya Sandi Sadewa, dhalang cilik saking Moyudan Sleman. Kanthi prigel siswa kelas 3 SD kasebat nyolahaken ringgit kadosdene dhalang limrahipun. Putranipun Suharyanto lan Eni Kusumastuti kasebat sampun tepang dhateng ringgit wiwit TK, saking ningali cd ringgit lajeng tumut kursus pedhalangan.

Festival dhalang cilik kados makaten suka kalodhangan kangge ngasah ketrampilan tumrap lare minangka generasi penerus seni pedhalangan dene wontenipun sanggar kados Sanggar Badranaya, inggih sakalangkung dipun betahaken minangka papan ajang kiprah.

Miturut Ketua penyelenggara festival dhalang cilik, Ki Guntur Songgo Langit, gumelaring festival minangka sarana suka kalodhangan dhateng para dhalang cilik kangge mitontonaken kasagedanipun, ngiras kangge mupuk raos kendel lan sengguh sarta kangge mengeti Hari Wayang Sedunia.

( Muhammad Sugeng )