Klaten,www.jogjatv.tv – Atusan guru matematika Sekolah Dasar wilayah UPTD Kecamatan Klaten Tengah lan Klaten Utara , ngestreni pelatihan lan workshop matematika. Kridha ingkang dipun gelar kalih dinten kasebat mengku ancas kangge mekaraken inovasi pembelajaran matematika Sekolah Dasar.

Bidang studi matematika, ngantos samangke dipun anggep pelajaran ingkang angel tumrap siswa. Supados ngremenaken pramila pelajaran matematika ing sekolah kedah dipun rekadaya supados gampil dipun tampi lan ngremenaken, mliginipun tumrap siswa SD. Miturut Kepala UPTD Pendidikan Klaten Tengah, Mohammad Isnaini, guru matematika asring kangelan mucal pelajaran matematika dhateng siswa SD. Awit saking punika betah cara mirunggan supados ngremenaken lan gampil dipun sinau. Lumantar workshop matematika pangajabipun para guru gadhah seserepan enggal kangge mucal pelajaran matematika supados ngremenaken tumrap siswa.

Pelajaran matematika dados titikan tumrap mata pelajaran sanesipun. Menawi biji matematika sae pramila biji mata pelajaran sanes ugi sae. Awit saking punika, wigati ngindakaken mutu guru matematika, lumantar pelatihan kanthi narasumber satunggaling master matematika.

(Purwanto)