Kota Yogyakarta, www.jogjatv.tv – TMMD reguler kaping 96 lan TMMD Sengkuyung Tahap Satu, taun anggaran 2016 wilayah Kodam Empat Diponegoro , dipun telengaken dhateng tlatah Karang Waru, Tegal Rejo Lan Bumijo, Jetis. Lampahng kridha dipun kepyakaken dening Walikota Yogyakarta, Haryadi Suyuti ing lapangan tegalrejo, dinten Selasa (3/5) enjing. Upacara dipun pandegani dening Walikota Yogykarta, Haryadi Suyuti sineksen  pejabat TNI,Polri sarta  warganing DPRD Kota Yogyakarta.  Progam TMMD ing kecamatan Tegalrejo lan jetis ngecakaken  redana anggaran TMMD taun 2016  gunggung 366 yuta rupiyah, 75 yuta dipun pendhetaken saking APBD DIY dene  291 yuta saking APBD Kota Yogyakarta. Program TMMD boten namung nengenaken  pambangunan fisik nanging ugi pambangunan non fisik antawisipun penyuluhan masyarakat  bab bebaya narkoba , radikalisme lan kamtibmas.Program TMMD ingkang dipun tindakaken setaun sepisan kawawas  trep kangge majenging pambangunan Kota Yogyakarta.

TMMD Mbangun Talud lepen Gajah Wong

Bantul, www.jogjatv.tv – Progam TMMD ing Kabupaten Bantul dipun telengaken dhateng Kecamatan Banguntapan ingkang dumunung ing tapel wates Kota Yogyakarta. Dinten Selasa (3/5) siyang,  lampahing progam TMMD kaping 96 Sengkuyung,  dipun kepyakaken ing Lapangan Singosaren Bantul. Upacara dipun pandegani dening Bupati Bantul, Suharsono sineksen  jajaran Forkopinda Bantul .

Miturut Dandim 0729 Bantul , Letkol Agus Widiyanto kridha progam TMMD sengkuyung taun 2016 samangke nengenaken  pambangunan talud Lepen Gajah Wong ingkang dumunung ing tapel wates Bantul lan Kota Yogyakarta . Kridha badhe lumampah sadanguning 21 dinten, kanthi ngecakaken redana APBD Bantul gunggung  75 yuta rupiah. Progam TMMD Sengkuyung badhe dipun tindakaken dening TNI lan  kabiyantu dening warga. (Hari Atmaja + Anang Zainuddin)