Yogyakarta, www.jogjatv.tv – Tumrap panjenengan ingkang remen susu nanging alergi susu nabati, saged nyobi susu uwos. Bahan ingkang dipun betahaken kangge ngocal susu uwos inggih uwos pethak, uwos abrit utawi uwos cemeng, minyak salad, gendhis pasir lan sarem. Warni susu gumantung warni uwos. Caraipun ngocal, uwos dipun kum 6 ngantos 8 jam, lajeng dipun tus, nuli dipun pususi. Salajengipun dipun cumplengaken dhateng toya umub 15 detik,   nuli dipun blender sadanguning 10 detik sarta dipun sukani gendhis pasir, minyak salad, lan sarem sacekapipun. Sasampunipun ajer, dipun saring. Susu uwos saged tumuli dipun unjuk utawi dipun lebtaken dhateng lemari es.

Susu uwos inggih gagasan 2 akademisi saking STP Ampta Yogyakarta, Sugiyanto lan Hermawan Prasetyanto. Miturut Sugiyanto tunimbang susu lembu, kandhutan protein susu uwos langkung kathah dene kandhutan lemakipun langkung andhap pramila trep tumrap tetiyang ingkang diet.

Pelatihan pembuatan susu beras dipun adani dening PT Pertamina Persero Region DIY-Jateng, kangge para muda lan masyarakat ingkang greget dados wirausaha. ( Twin Kumilah )