Klaten, www.jogjatv.tv – Dinten Senen (8/8) enjing, sawetawis kelompok tani ing Kecamatan Ngawen, Klaten, Jawa Tengah,  panen pantun lampah panyobi Sistem Tanam Jajar Legowo, dua-satu, empat-satu dipun bandingaken sistem tanam ubinan. Sistem Tanam Padi Jajar Legowo  2-1 asilipun langkung maremaken tinimbang sistem sanesipun, awit sunaring surya waradin satemah taneman pantun tuwuh subur.

Panen pantun dipun tindakaken ing demplot BP3K Kecamatan Ngawen,  dhateng pasabinan Desa Ngawen, Kecamatan Ngawen  Klaten Jawa Tengah, kanthi ngecakaken Sistem Tanam  Jajar Legowo, 2-1 lan 4-1 dipun bandingaken kaliyan sistem ubinan, utawi cara tanem konvensinal.  Panen pantun dipun tindakaken kanthi mendhet conto dhateng  3 titik , wiyar 2,5 meter persagi. Asil panen pantun Sistem Tanam Jajar Legowo 2-1 asilipun 4,4 kg,  sistem tanam jajar legowo 4-1, asilipun 3,7 kg  dene sistem tanam ubinan, asilipun  3,2 kg. Kanthi makaten kawuningan bilih asil panen kanthi teknologi Sistem Tanam Jajar Legowo 2-1, langkung kathah tinimbang sistem sanesipun.

Dhapuran pantun kanthi Sistem Jajar Legowo 2-1 ugi langkung kathah, cacahipun ngantos 200, sistem 4-1, 165  dene sistem ubinan 144 saben dhapuran. Sri lanjar mratelakaken, dhateng demplot kasebat ingkang beda namung cara tanemipun kemawon, pangupakawis lan rabukipun imbang.  Ujicoba tanam dhateng demplot BP3K Kecamatan Ngawen punika badhe dipun biwarakaken dhateng sanak kadang tani ing tlatah Klaten, Jawa tengah, kangge nikelaken produktifitas pantun. ( Haryadi )