Magelang, www.jogjatv.tv – Satuan Kerja Perangkat Daerah, Pemerintah Kabupaten Kendal napak asmani komite integritas, anti korupsi, dinten Sene (25/1). Kanthi makaten, Kabupaten Kendal, mujudaken kabupaten sepisanan ing Jawa Tengah ingkang ndhapuk komite integritas. Komite kasebat badhe memitran kaliyan Komisi Pemberantasan Korupsi kangge nebihi lan bengkas praktek korupsi tataran pemerintah daerah.

Kajawi Kabupaten Kendal, Pemerintah Kabupaten Kebumen ugi sampun napak asmani tunas komite integritas lan salajengipun ugi badhe tumuli dhapuk komite integritas.

Miturut Gubernur Jawa Tengah, Ganjar Pranowo, sinaosa nembe Pemerintah Kabupaten Kendal ingkang napak asmani komite integritas, pehakipun ugi suka pamrayogi supados calon bupati , walikota terpilih tumut napak asmani, supados sedaya pemerintah daerah ing tlatah Jawa Tengah kalis saking praktek korupsi.

Kanthi wontenipun komite integritas , Jawa Tengah dados salah satunggaling provinsi ingkang saged milujengaken keuangan negara, ing taun 2015 suka 40 palapuran kanthi nilai finansial Rp 13.960.000,00 dene tumapak taun 2016 samangke sampun wonten 8 palapuran kanthi nilai finansial Rp 54.100.100,0 lan 670 dolar AS.

Kathahipun palapuran nilai gratifikasi kasebat, inggih wujud kesadaran pemerintah salebeting nampik gratifikasi. (Yuki Pramudya)