Sleman, www.jogjatv.tv – Dungkap pengetan Sa Abad Hadeging Kabupaten Sleman tanggal 15 Mei benjing sawetawis kantor dipun pasangi rontek lan umbul-umbul, tembok, pager kantor lan trotoar ugi dipun cat malih dene margi mathis ing tlatah Sleman samangke rinengga lampion.

Miturut Ketua panitia Pengetan Sa Abad Hadeging Kabupaten Sleman, Sukarno,perkantoran Pemkab Sleman wiwit dipun tata seminggu pungkasan. Sukarno ngajab, boten namung kantor pemkab kemawon ingkang dipun rengga nanging sageda rumambah dhateng bebadan swasta lan padukuhan Sa Sleman amrih pengetan ambal warsa Kabupaten Sleman samangke regeng.Sukarno ugi mratelakaken salebeting pengetan Sa  Abad Hadeging Kabupaten Sleman, Pemkab Sleman nggelar maneka kridha sesirah Angka 100, antawisipun bedah rumah tidak layak huni  100 unit, supitan masal 100 lare, ngedum sepeda 100 unit dhateng siswa miskin, suka bantuwan 100 unit alat bantu dengar lan  operasi katarak lelahanan tumrap 100 panandhang katarak. (Subardi)