Sleman, www.jogjatv.tv – Kangge miwiti panen pantun, Kelompok Tani Ngudi Makmur Padhukuhan Krajan, Desa Sidoluhur, Kecamatan Godean, Sleman, dinten Setu (16/1) nggelar upacara adat wiwit kanthi dipun regengaken kirab budaya. Ancasipun minangka pratelan raos syukur dhumateng Gusti ingkang hakarya jagad sarta kangge memetri kagunan budaya tilaran leluhur.

Kirab bidhal saking griya salah satunggaling warga tumuju papan gumelaring upacara ingkang tebihipun 500 meter dipun pucuki, paguyuban sholawatan, sumusul bregada ingkang ngarak maneka sesaji lan atusan warga Padukuhan Krajan. Upacara adat wiwit dipun tandhani kanthi methik wulen pantun dening sesepuh masyarakat kalajengaken kenduri lan kembul sekul wiwit.

Miturut Ketua Kelompok Tani Ngudi Makmur, Subandiyo, warganing kelompok tani nanem pantun Ciherang. Miturut ubinan, asil panen maremaken, nggayuh 8,3 ton gabah kering panen saben hektar. Ketua Lembaga Pengembangan Kebudayaan Nasional, Arif Bintoro Johan nyengkuyung upacara wiwit ingkang dipun gelar dening Kelompok Tani Ngudi Makmur awit dados kalodhangan memetri kagunan budaya amrih regenging wisata budaya ing Indonesia. (Subardi)